أرشيف | يوليو, 2011

مرت سنه

4 يوليو

مرت سنه ..اكتب عنك اقول شنو

مافى كلام بتكتب

عن زول صديقك فارقك

لا قدرت تودعو و لا عرفت تكون معاو اخر الطريق

مجروح قلبي و حزين

ما قادر اسامح نفسي و لا قادر اعتبرك خلاص

زى كانك سافرتى

زى كانك بس مشيتى بدون سلام

بدون كلام

سخيفه الكلمات ما ليها معنى

ما قادره تشرح

ما عارفه تحكيك

اسكت احسن

….

يا زهرة الله يرحمك

ما قادره اتذكر كان ياتو يوم ..عشان كدا الشهر الفات من اولوا لاخرو كنت بفكر فيك .. لسه نمرتك فى موبايلى و لسه بفتكر انو بس طولت منك … زى عادتى ..و  لو اتصلت ممكن تردى .

ما كنت بستاهلك ..كنت صحبتى اكتر ما كنت صحبتك …ما قادره اتصور انو ما حضرت العمليه ..و ما عرفت الا تانى يوم …اخوك بواسينى تخيلى بدل ما اصبروا …الدكتور مات فما قادره اتكلم عنو … بس مفقوعه من الحصل ؟ بقيت بكره المستشفى دى وكل ما اسمع زول ماشي ليها قلبي بوجعنى … يومك على قول هاني اخوك ..لكن انا عارفه هو اكتر زول تعب من القصه دى .

ما مفروض اكتب عنك حاجة حزينه لانك بس مبتسمه ما بقدر اتذكرك غير كدا . طول عمرك مريضه و طول عمرك هزيله و حتى اخر مره كلمتك مشرقه … بالجد زى ما بقولوا الطيبين ما بعيشوا كتير

امس كان عيد ميلادك .. والليله عيد ميلادي …ما كان عندك ولا هدية منى و لسه هديتك محفوظه…مافي ايام ممكن ترجع عشان اكون معاك اكتر …بس متاكده انك عارفه قدر شنو بحبك و بدعي ليك .

%d مدونون معجبون بهذه: